gazizaofficial_l114vrgm 
Астанада Қазақстан Республикасының Президенті Қасым-Жомарт Тоқаевтың төрағалығымен Жоғары Еуразиялық экономикалық кеңестің отырысы өтті. Іс-шараға ЕАЭО-ға мүше мемлекеттердің жоғары лауазымды өкілдері, атап айтқанда Ресей Президенті Владимир Путин, Беларусь Президенті Александр Лукашенко, Қырғызстан Президенті Садыр Жапаров және Армения Премьер-министрінің орынбасары Мгер Григорян қатысты.
Биыл Қазақстан Еуразиялық экономикалық одақтың негізгі органдарына — Жоғары Еуразиялық экономикалық кеңеске, Еуразиялық үкіметаралық кеңеске және Еуразиялық экономикалық комиссия кеңесіне төрағалық етуде.
Қасым-Жомарт Тоқаевтың 2025 жылғы 31 желтоқсанда ЕАЭО елдері көшбасшыларына жолдаған үндеуінде белгіленген төрағалық басымдықтарының қатарында экономикалық интеграцияны күшейту үшін жасанды интеллект технологияларын енгізу, одақтың логистикалық әлеуетін дамыту, өнеркәсіп пен агроөнеркәсіптік кешенді цифрлық трансформациялау, өзара саудадағы әкімшілік кедергілерді жою және одақтан тыс мемлекеттермен экономикалық ынтымақтастықты кеңейту бар.
Бұған дейін Қазақстан астанасында ЕАЭО елдерінің басшыларын жинаған V Еуразиялық экономикалық форум өткен болатын.
Сондай-ақ 28 мамыр күні Қасым-Жомарт Тоқаев пен Владимир Путин шағын құрамда келіссөз жүргізді. Кездесу барысында Қазақстан басшысы Қазақстан мен Ресейдің өңірлік ынтымақтастығы жөніндегі форумды 20 тамызда Омбы қаласында өткізуді ұсынды.
Кеңейтілген форматтағы келіссөздерде Қазақстан Президенті екі ел арасындағы экономикалық серіктестіктің тұрақты дамып келе жатқанын атап өтті. Оның айтуынша, екіжақты сауда көлемі алдағы уақытта 30 млрд доллардан асуы мүмкін, сондай-ақ жалпы құны шамамен 53 млрд доллар болатын 170-тен астам бірлескен жоба жүзеге асырылуда.
