Alua Sabyrbayeva 
Мемлекет басшысы педагог мәртебесі мәселелері бойынша Қазақстан Республикасының Әкімшілік құқық бұзушылық туралы кодексіне өзгерістер енгізу туралы заңға қол қойды.
Сондай-ақ Президент педагог мәртебесі, білім беру, денсаулық сақтау және бала құқықтарын қорғау мәселелері бойынша кейбір заңнамалық актілерге өзгерістер мен толықтырулар енгізу туралы заңды да бекітті.
Бұған дейін Қазақстанда педагогтардың оқушылар үшін жауапкершілігі тек оқу процесі кезінде ғана заң жүзінде бекітілетіні хабарланған болатын. Сабақтан тыс уақытта төтенше жағдай туындаған жағдайда балалар үшін ата-аналары немесе заңды өкілдері жауапты болады.
Мәжілісте заң жобасын таныстыру барысында депутат Асхат Аймағамбетов мұғалімдер мен мектеп директорлары оқу процесінен тыс уақытта балалар үшін жауап бермеуі тиіс екенін айтқан еді. Ол педагогтарды «қорғау қажет» екенін атап өтіп, бұл мәселеде заңда екіұшты түсіндірмелер болмауы керектігін жеткізді.
Заң аясында мұғалімдерді артық есеп беруден қорғау да қарастырылған. Енді педагогтардан білім беру саласының заңнамасында көзделмеген кез келген есеп пен ақпаратты талап етуге тыйым салынады.
Сонымен қатар, құжаттарды қағаз және электронды түрде қатар жүргізуді талап ететін жағдайларға әкімшілік жауапкершілік енгізіледі.
Мектептерде смартфондарды пайдалану тәртібі де заңмен реттелді. Оқу-ағарту министрлігі білім беру ұйымдарында мобильді телефондарды қолдану ережелерін бекіту құқығына ие болады.
Жаңа нормаларға сәйкес, сабақ кезінде телефондар дыбыссыз режимде болуы және мұғалімнің рұқсатынсыз пайдаланылмауы тиіс. Бақылау жұмыстары мен емтихандар кезінде смартфон қолдануға толық тыйым салынады (мұғалімнің ерекше шешімі жағдайларын қоспағанда). Гаджеттер тек білім беру мақсатында, мысалы цифрлық платформалар мен оқу жобаларында ғана қолданылуы мүмкін.
