Президент Қасым-Жомарт Тоқаев ресми сапармен Қазақстанға келген Черногория Президенті Яков Милатовичті Ақордада қарсы алды.

Салтанатты қарсы алу рәсімінде екі елдің президенттері ресми делегация мүшелерін таныстырды. Сондай-ақ Құрмет қарауылының сап түзеуі өтіп, Қазақстан мен Черногорияның мемлекеттік әнұрандары орындалды. Бүгін мемлекет басшылары жоғары деңгейдегі келіссөздер өткізеді.

Келіссөздер барысында тараптар Қазақстан мен Черногория арасындағы саяси диалогты нығайту, сауда-экономикалық, инвестициялық және мәдени-гуманитарлық ынтымақтастықты кеңейту мәселелерін талқылайды. Сонымен қатар өзара сауда көлемін арттыру және бірлескен жобаларды жүзеге асыру перспективалары қаралады.

Айта кетейік, Яков Милатовичтің Қазақстанға ресми сапары 18-20 маусым аралығында өтуде. Бұл сапар екі мемлекет арасындағы байланыстарды жаңа деңгейге көтеруге және өзара тиімді әріптестікті одан әрі дамытуға серпін береді деп күтілуде.